मोर तरिया के फोटू ल बचा के रखिहव जी : काव्य संग्रह "राम-राम के बेरा" से साभार

मोर तरिया के फोटू ल बचा के रखिहव जी।

मोर तरिया के फोटू ल बचा के रखिहव जी।
ये सिरावत हे,
अजगर खावत हे,
पीढ़ी ल बता के रखिहव जी।
मोर तरिया के फोटू ल बचा के रखिहव जी।

मोर तरिया के तऊड़ईया नंदावत हें जी।
नरवा, झोरका के नहईया सिरावत हें जी।
अवईया पीढ़ी ल चिंता जना के रखिहव जी।
मोर तरिया के फोटू ल बचा के रखिहव जी।

बर-पिपर के थिलिंगि ले कुदईया डरावत हें जी।
सुक्खा तरिया म कुदे बर जीव कंपकपावत हें जी।
तरिया भीतरी के राहेर लहलहावत हे जी...
ओनहारी के खुसबु घलो महमहावत हे जी।
मोर तरिया के फोटू ल बचा के रखिहव जी।

तरिया म होगे कबजा.....
तरिया म होगे कबजा......
तुँहर पारा के डी.जे. ह बऊरावत हे
बकबकावत हे जी।
ऐ धरती के कोरा म
सोनहा धान ह अल्लावत हे जी।
मोर तरिया के फोटू ल बचा के रखिहव जी।

चलव संगी, सुमता मड़हा के
कोड़बो एक ठी तरिया।
नई बनन दन गऊठान ल कखरो परिया।
मान लव मितान,
हुलेश्वर संग सुमता बनाके रखिहव जी
मोर तरिया के फोटू ल बचा के रखिहव जी।

नरवा के नस म, पानी बोहावत रईही जी
बाहरा नार ह समंदर के पहिचान बनावत रईही जी।
झमलु के तऊड़ई ले हक खाके !
अतेक झन तऊड़ बेटा, महतारी ह चिल्लावत घलो रईही जी।
मोर तरिया के फोटू ल बचा के रखिहव जी।

(हुलेश्वर प्रसाद जोशी)

दिनांक 19-03-2025

गरांजी, नारायणपुर

यह कविता (शीर्षक : मोर तरिया के फोटू ल बचा के रखिहव जी।) श्री हुलेश्वर प्रसाद जोशी द्वारा लिखित एवं शीघ्र प्रकाशनाधीन काव्य संग्रह राम-राम के बेरा "RAM-RAM ke BERA" की कविता है। कवि की पहली प्रकाशित काव्य संग्रह "लिख दूँ क्या ?" है। 

मोर तरिया के फोटू ल बचा के रखिहव जी

म्यूज़िकल सॉन्ग्स के साथ सुनने के लिए यहाँ क्लिक करें >>